११ माघ, काठमाडौं । यू–२२ एसियन बक्सिङ च्याम्पियनसिपमा नेपाली खेलाडी सुष्मा तामाङ फाइनलमा पराजित भएकी छन् ।
रजतमै सीमित हुनुपरे पनि उनको उपलब्धि नेपाल बक्सिङका लागि अहिलेसम्मकै ठूलो हो ।एसियन बक्सिङ कन्फिडरेसनको मान्यताप्राप्त प्रतियोगितामा नेपालले रजत जितेको यो पहिलोपल्ट हो । सुष्मा बुधबार भएको ४८ केजी तौलसमूहको फाइनल प्रतिस्पर्धामा उज्वेकिस्तानकी फोजिलोभा फार्जोनासँग पराजित भएकी हुन् ।
यसअघि उनले क्वाटरफाइनलमा भियातनामकी फाम थी किनहान र सेमिफाइनलमा मंगोलियाकी बाइसेनबाई जनरगुलीलाई पराजित गरी ऐतिहासिक रुपमा फाइनलमा पुगेकी थिइन् ।
थाइल्याण्डको बैंककमा भइरहेको प्रतियोगितामा फरक तौलसमूहका ३ पुरुष र ३ महिला खेलाडीले प्रतिस्पर्धा गरेका थिए । नेपालका अन्य तीन खेलाडीले कांस्य पदक जितेका छन् ।
क्वाटरफाइनलमा सिंगापुरकी चाओ जी मिन बेरनिसलाई पराजित गरी सेमिफाइनलमा पुगेकी ५७ केजी समूहकी हुमा राई, बाइ पाएर सिधै सेमिफाइनलमा पुगेकी ७५ केजी समूहकी त्रिशा जगेबु र पुरुषतर्फ ८६ केजी तौलसमूहका विजय बाटाले कांस्य पदक जितेका हुन् ।
