अहिले सञ्चालनमा रहेको टीएमएसप्रति गुनासो गर्दै सेयर कारोबारका लागि ३३ ब्रोकर कम्पनी मिलेर आफ्नै लगानीमा कम्पनी स्थापना गरी एउटै कारोबार व्यवस्थापन प्रणाली (टीएमएस) चलाउने भएका छन् ।
ब्रोकरले नयाँ टीएमएस चलाउने तयारी गरेर नेपाल स्टक एक्सचेन्ज (नेप्से) मा निवेदन दिएका थिए । धितोपत्र कारोबार नियमावलीले ब्रोकरलाई आफ्नै टीएमएस चलाउने बाटो खुल्ला गरे पनि अहिलेसम्म गृहकार्य भएको थिएन । ब्रोकरले नयाँ टीएमएस चलाउनका लागि अनुमतिका लागि निवेदन दिएपछि सहमतिपत्र (एलओआई) दिइएको नेप्सेका प्रवक्ता मुराहरि पराजुलीले जानकारी दिए ।
नेपाल स्टक ब्रोकर एसोसिएसनका पूर्व अध्यक्ष नरेन्द्रराज सिजापति नयाँ टीएमएसबाट अबको एक महिनाभित्रमा कारोबार सुरु हुने बताउँछन् । केही दिनअघि मात्रै अबको एक महिनाभित्रमा टीएमएस तयार हुने जानकारी आफूहरूलाई दिइएको सिजापतिले बताए ।
नयाँ टीएमएस बनाउनको लागि ३३ ब्रोकर कम्पनीको पनि लगानी रहने गरी एक कम्पनी खडा गरिएको छ । सोही कम्पनीले श्रीलंकामा अहिले सञ्चालनमा रहेको टीएमएस नेपालको लागि कष्टमाइज्ड गरेर सञ्चालन गर्ने गृहकार्य भएको छ ।
