जेठ ३ काठमाडौँ । नेपाली टोलीले मलेसियाको क्वालालम्पुरमा आयोजना हुने सेपाकताक्रो विश्वकपमा सहभागिता जनाउने भएको छ । विश्वकपमा सहभागी हुने नेपाली राष्ट्रिय सेपाकताक्रो टोलीलाई युवा तथा खेलकुद मन्त्री विराजभक्त श्रेष्ठले बिहीबार बिदाइ गरे ।
मन्त्री श्रेष्ठले नेपाली टोलीलाई विश्वकपमा उच्च मनोबलसहित उत्कृष्ट प्रदर्शन गर्न शुभकामना दिए । रोशन तामाङको कप्तानीमा रहेको नेपाली टोलीमा दीपेशजंग थापा, उमेशबहादुर महतो, अनिल जर्घामगर, विजय महतो र पदमबहादुर थाडामगर रहेका छन् ।
नेपाली टोलीको प्रशिक्षकमा श्यामबहादुर श्रेष्ठ, व्यवस्थापकमा नेत्रप्रसाद गुरुङ र अन्तर्राष्ट्रिय टेक्निकल अफिसरमा नेसिर मास्के रहेका छन् । शनिवारदेखि सुरू हुने विश्वकपमा २१ राष्ट्रको सहभागिता रहने बताइएको छ । नेपाल प्रतियोगिताको डिभिजन ‘एक’ मा रहेको छ । नेपालको समूहमा नौवटा राष्ट्रबिच प्रतिस्पर्धा हुनेछ ।
