काठमाडौं । झण्डै चार दशकअघिको चर्चित गीत ‘पानको पात’ श्रोतामाझ कालजयी छ । प्रेमराजा महत र बमबहादुर कार्कीलगायतले यो गीतमा स्वर दिएका थिए । त्यतिबेला यी दुईले अन्य चर्चित गीतमा पनि सहकार्य गरे । अहिले आएर ‘पानको पात’को जोडीबीच पुनः सहकार्य भएको छ ।
मंगलबार म्युजिक नेपालको स्टुडियोमा ३७ वर्षअघिको एक हिट गीतको पुनः रेकर्डिङमा महत र कार्कीले स्वर दिए । कुन हिट गीत भन्ने त खुलाएनन् तर पानको पातसहितका केही हिट गीतमा यी दुईले सहकार्य गरेका छन् । दर्शकलाई ‘सरप्राइज’ दिन उनीहरुले कुन गीतमा पुनः रेकर्ड गरे भन्ने खुलाएका छैनन् ।
‘त्यतिबेलाको हिट गीतलाई पुनः रेकर्ड गरेका हौं । कुन गीत भनेर भन्दैनौं । त्यतिबेलाको पुरानो प्रविधिमा गीत रेकर्ड गरेका थियौं । त्यतिबेला लाइभमा गाउनुपर्थ्यो । त्यतिबेला स्वर र संगीतमा सुधार गर्ने अवस्था थिएन । अहिले त्यो सुविधा छ । श्रोता-दर्शकले यसलाई पुरानो गीततर्फ फर्किएको रुपमा पनि लिन सक्नुहुन्छ,’ कार्कीले भने ।
धेरैले आफूहरुको जोडीका गीत सुन्ने चाहना गरिरहेकाले केही दिनमै यो योजना बनेको उनले बताए । दर्शक-श्रोताले चाँडै यो गीतलाई श्रव्य र दृश्यमा हेर्न सक्नेछन् ।
