काठमाडौं । पर्सा प्रहरीले ८ वटा चोरीको मोटरसाइकल सहित ४ जना चोरलाई पक्राउ गरेको छ ।
पक्राउ पर्नेहरुमा वीरगञ्ज महानगरपालिका–२६ का २० वर्षीय राम प्रबेश पटेल, २६ वर्षीय अशोक पटेल, १९ वर्षीय शिबम पाण्डे र २० वर्षीय आकाश तिवारी रहेका छन् । चोरी गर्ने समूहले मुख्य साँचो (मास्टर की) प्रयोग गरेर र मोटरसाइकलको ह्याण्डल लक तोडेर चोरी गर्ने गरेको प्रहरीको प्रारम्भिक अनुसन्धानले देखाएको छ ।
पक्राउ पर्नेहरुलाई चोरी सम्बन्धी कसुरमा जिल्ला अदालतबाट म्याद लिएर थप अनुसन्धान गरी रहेको जिल्ला प्रहरी कार्यालय पर्साका प्रवक्ता दिपक गिरीले जानकारी दिनुभयो ।
