काठमाडौं । कृषि विकास बैंकले गत आर्थिक वर्ष २०८०/८१ मा ३ अर्ब ६५ करोड रुपैयाँ खुद नाफा कमाएको छ । अघिल्लो वर्ष जम्मा १ अर्ब ३२ करोड नाफा कमाएको बैंकले एकैवर्ष १७६ प्रतिशतले नाफा वृद्धि गर्न सफल भएको हो ।
खासगरी आर्थिक वर्षमा बैंकको वित्तीय कारोबारमा खुद ब्याज आम्दानी बढ्नुका साथै सञ्चालन नाफा लगायत खराब कर्जा असुलीमा बैंकले देखाएको सक्रियताका कारण आर्थिक वर्षमा बैंकको आम्दानीमा तीव्रता आएको देखिन्छ ।
अघिल्लो आर्थिक वर्ष बैंकको खुद ब्याज आम्दानीजम्मा ८ अर्ब १९ करोड रहेकोमा गत वर्षमा १० अर्ब १२ करोड रुपैयाँ पुगेको बैंकको रिपोर्टले देखाएको छ । यता खराब कर्जाको दर कम भएसँगै बैंकले आर्थिक वर्षमा लोन लस प्रोभिजनमा जम्मा १ अर्ब २३ करोड रुपैयाँ मात्र छुट्याएको छ ।
तथापि, अघिल्लो आर्थिक वर्ष २.७८ प्रतिशत रहेकोमा यस्तो खराब कर्जा पछिल्लो वर्ष बढेर ३.४४ प्रतिशत पुगेको बैंकले जनाएको छ । बैंकको वितरणयोग्य नाफा २ अर्ब ६६ करोड रुपैयाँ छ भने प्रतिसेयर आम्दानी २४ रुपैयाँ ७५ पैसा रहेको छ । यस्तो आम्दानी पहिले ७ रुपैयाँ ४२ पैसा थियो ।
यस्तै बैंकको प्रतिसेयर नेटवर्थ २३३ रुपैयाँ रहेको बैंकले असार मसान्तसम्म २ खर्ब १ अर्ब रुपैयाँ कर्जा प्रवाह गरेको छ । बैंकको कर्जा प्रवाह १४ प्रतिशत बढेको हो ।
