काठमाडौं । नेपाल स्टक एक्सञ्जेच (नेप्से) ले २२ सयको विन्दु पार गरेको छ । लामो समयदेखि नेप्से १८ सय र २२ सयको बिचमा घुमिरहँदा बिहीबार २२ सयको विन्दु पार गरेको हो ।
नेकपा माओवादीसँगको सत्ता गठबन्धन तोडेर नेकपा एमालेले नेपाली कांग्रेससँग गठबन्धन गरेर सरकार परिवर्तन हुने भएसँगै नेप्सेमा उछाल आएको हो।
प्रधानमन्त्री पुष्पकमल दाहाल प्रचण्डले भाेलि विश्वासको मत लिने र उनले विश्वासको मत नपाउने देखिपछि आज एकै दिन नेप्से २९ अंकले बढेको छ ।
सत्ता गठबन्धन परिवर्तनको संकेतसँगै लगातार बजार बुल ट्रेन्डमा चलिरहेको छ । बिहीबार साताको अन्तिम कारोबारको दिन नेप्से २९.२१ अंकले बढेको हो । आज नेप्से १.२४ प्रतिशतले बढेर २२०४.६१ विन्दुमा पुगेको छ ।
आज बजारमा उछाल आएसँगै लाइफ इन्स्युरेन्स समूहमा पनि उछाल आएको छ । आज एकै दिन लाईफ इन्स्योरेन्स समूह ३१८.६९ अंकले बढेर १०७२७.७३ विन्दुमा पुगेको छ । बिहीबार १३ वटा समूहमध्ये १२ वटा समूहमा उछाल आउँदा लघुवित्त समूह भने २५.९१ अंकले घटेको छ । आज लघुवित्त समूह ०.५३ प्रतिशतले घटेर ४९४७.२४ विन्दुमा पुगेको छ ।
आज निर्जीवन बीमामा पनि लगानीकर्ताको उत्साह तेत्तिकै रहेको छ । निर्जीवन समूह आज पनि १११.९० अंकले बढेर १११४२.२१ विन्दुमा पुगेको छ ।
आज १५४ वटा कम्पनीको शेयर मूल्य बढ्दा ७ अर्ब बढीको कारोबार भएको छ । बिहीबार ७ अर्ब ८ करोड ६ लाख ९८ हजार रुपैयाँ बराबरको कारोबार हुँदा ७८ वटा कम्पनीको शेयर मूल्य भने घटेको छ । १२ वटा कम्पनीको शेयर मूल्य भने स्थिर रहेको छ ।
आज ३३१ वटा कम्पनीको शेयर कारोबार हुँदा २ करोड २ लाख ३७ हजार ७८० कित्ता शेयर ८७ हजार ८६ पटक किनबेच भएको छ । बजारमा उछाल आउँदा ३ वटा शेयर मूल्यमा भने १० प्रतिशतले बढेर सकारात्मक सर्किट लागेको छ ।
