काठमाडौं । उपप्रधान तथा गृहमन्त्री रवि लामिछाने राष्ट्रिय सभाको बैठकमा अनुपस्थित भएका छन् । गृह मन्त्रालयको आगामी आर्थिक वर्षको बजेटमाथिको छलफलमा लामिछाने अनुपस्थित भएका हुन् । लामिछानेको तर्फबाट श्रम, रोजगार तथा सामाजिक सुरक्षा मन्त्री डोलप्रसाद अर्यालले गृह मन्त्रालयसँग सम्बन्धित प्रश्नहरूको जवाफ दिएका थिए । मन्त्री अर्यालले लिखित रूपमा तयार प्रति वाचन गरेर जवाफ प्रस्तुत गरे ।
त्यसपछि पूरक प्रश्न सोध्ने क्रममा कांग्रेसका सांसद आनन्दप्रसाद ढुंगानाले गृहमन्त्री कहाँ गएको हो भनेर सोधे । तर श्रममन्त्री अर्यालले गृहमन्त्री कहाँ गएको हो खुलाएनन् ।
मन्त्री अर्यालले भने, ‘गृहमन्त्रीज्यूको उपस्थितिमा उहाँ आफैंले आएर पछिल्लो अवस्था (विपद्)को बारेमा जानकारी दिनुपर्ने सुझाव दिनुभएको छ । यो सुझावको जिम्मेवारी दिन्छु र गृह मन्त्रालयलाई यो जानकारी मेरो तर्फबाट पनि गराउने प्रतिवद्धता व्यक्त गर्न चाहन्छु ।’
