काठमाडौँ । साताको कारोबारको अन्तिम दिन पनि सेयर बजार परिसूचक (नेप्से) मा १९.८९ अंक गिरावट भएको छ । बजेटको भोलिपल्ट बुधबार २३ अंक माथिले घटेको नेप्से बिहीबार थप १९.८९ अंकले घट्दै २ हजार ६९.५३ बिन्दु झरेको हो ।
आज ‘क’ वर्गको सेन्सेटिभ इन्डेक्स समेत ३.९० अंकले घट्दै ३७०.१९ बिन्दुमा झरेको नेपाल स्टक एक्सचेञ्जले जनाएको छ । नेपाल स्टक एक्सचेन्जका अनुसार बिहीबार ९८ लाख ६४ हजार ४८२ कित्ता सेयर किनबेच हुँदै ४ अर्ब २१ करोड ७४ लाख रुपैयाँ बराबरको कारोबार भएको छ ।
आज फाइनान्स, हाइड्रोपावर र म्यानु एण्ड प्रो समूहको उपसूचक धनात्मक भएका छन् भने बाँकी १० वटा उपसूचक ऋणात्मक भएका छन् । म्यानु एण्ड प्रो समूहको उपसूचक १.२३ प्रतिशतले बढ्दा हाइड्रोपावर समूहको उपसूचक ०.४९ प्रतिशतले र फाइनान्स समूह ०.१५ प्रतिशतले बढेको छ ।
आज तीन वटा कम्पनी नेपाल फाइनान्स, अपर लोहोरे खोला हाइड्रोपावर कम्पनी र भगवती हाइड्रोपावर कम्पनीको सेयर मूल्य समान १० प्रतिशतले बढेको छ भने पोखरा फाइनान्सले १० प्रतिशतले मूल्य गुमाएको छ ।
