बैशाख २१ काठमाडौं । नयाँ नेपाली चलचित्र ‘मनसरा’ शुक्रवारदेखि देशभरका सिनेमा हलमा प्रदर्शनमा आएको छ । स्टारकास्ट रहेको चलचित्र तथा कबड्डीको ब्राण्डका कारण पनि चलचित्रले दर्शकलाई सिनेमा हलसमम तान्ने अनुमान गरिएको छ । ट्रेलरले बनाएको हाइपले पनि यो चलचित्र प्रतिक्षित बनेको छ ।
उपेन्द्र सुब्बाको लेखन तथा निर्देशन रहेको चलचित्रमा दयाहाङ राई, प्रवीण खतिवडा, मिरुना मगर र मेनुका प्रधान मुख्य भूमिकामा छन् भने सत्यराज आचार्य, हेमन्त बुढाथोकी, शान्ति गिरी, नेनहान राईलगायतले पनि अभिनय गरेका छन् ।
चलचित्रका निर्माता छायांकार शैलेन्द्रध्वज कार्की हुन् भने चलचित्रका छायांकार पनि कार्की नै हुन् । यो चलचित्रले अन्तरजातीय सम्बन्धको आयाम तथा नि सन्तान दम्पतीहरुको मनोदशालाई मुख्य विषयवस्तु बनाएको छ ।
दुई दिनअघि आयोजित चलचित्रको प्रीमियर शोमा चलचित्र हेर्ने अधिकांशले प्रसंशा छन् । चलचित्रमा विष्णकुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ सहनिर्माता छन् ।
निमेश श्रेष्ठको सम्पादन, अर्जुन कार्कीको रंग संयोजनको साथमा श्रवल राज पाण्डेको साउण्ड डिजाइन रहेको छ भने मानाहाङ लावती, मनिक शंखर र सुभम चाम्लिङ राईको संयुक्त कला निर्देशन रहेको छ । चलचित्र एप्पल इन्टरटेन्मेन्ट कम्पनीले वितरण गर्दैछ । क्युएफएक्स थिएटर पार्टनर रहेको छ भने जी टु वान डिजिटल पार्टनर हो ।
