काठमाडौँ । माघी नजिकिएसँगै काठमाडौंको कालीमाटी तरकारी बजारमा तरुल भित्रिएन थालेका छन् । माघे सङ्क्रान्तिमा विशेष गरी तरुल, तिलको लड्डु, ध्यू, चाकु, सखरखण्डलगायत परिकार खाने चलन भएकाले माघे सङ्क्रान्ति नजिकिँदै गर्दा तरुलको माग पनि बढ्दै गएको हो ।
मागलाई धान्न अहिले कालीमाटीस्थित थोक तरकारी बजारमा देशका विभिन्न भागबाट ठूलो मात्रामा तरुल ल्याइँदै छ। काठमाडौँमा भित्रने तरुलमा सर्लाहीबाट सबैभन्दा धेरै र सर्लाहीबाहेक धादिङ, काभ्रे, मकवानपुर, चितवन, नवलपरासी तथा धरान र सुनसरीबाट पनि तरुल आयात हुने गरेका छन् ।
कालीमाटी तरकारी बजारमा अहिले सिमल तरुल, हात्तीपाइले तरुल, निलो तरुल, वन तरुल, सेतो तरुल र स्कुसका जरा भित्रिएको छ ।
अहिले कालीमाटी तरकारी बजारमा आकार र जातअनुसार तरुल प्रतिढक (५ केजीको) ३०० देखि ५०० रुपैयाँसम्ममा किनबेच भइरहेको छ। वनतरुल भने प्रतिकेजी ३०० देखि ३५० रुपैयाँमा बिक्री भइरहेको छ।
