काठमाडौँ । अभिनेत्री करिश्मा श्रेष्ठ दिवाकर भट्टराईको निर्देशन रहने फिल्म ‘मायावी’ मा भित्रिएकी छन् । निर्माण युनिटले फिल्मको मुख्य भूमिकाको लागि उनलाई अनुबन्धित गरेको हो ।
फिल्मको कलाकारको रुपमा यस अगाडि निर्माण युनिटले दीपिका प्रसाई, पल साह, सुशील सिटौला र समीम खान अनुबन्धित भएका थिए । करिश्मा फिल्म ‘एउटा साथी’ बाट नेपाली रजतपटमा डेब्यू गरेकी हुन् । त्यसपछि ‘लभ सब’ र ‘बाबु कान्छा’ लगायत फिल्म अभिनय गरेकी उनी लामो समयपछि फिल्म अभिनयमा कमव्याक गर्न लागेकी हुन् ।
अभिनेता राज कटुवाल समेत निर्माता रहेको फिल्मको कथा निर्देशक भट्टराई स्वयंको हो । क्रिएटिभ सिने आर्टसको व्यानरमा निर्माण हुन लागेको फिल्ममा एसडी योगीको संगीत, राम अविरल विष्टको गीत, राजुविक्रम थापाको डिओपी रहनेछ ।
फिल्म असोज २ गतेबाट फ्लोरमा जानेछ । फिल्मको छायांकन पोखराको रमणीय स्थलमा गरिने निर्देशक भट्टराईले जानकारी दिए । दिवाकरले फिल्म ‘मेरो जीवन साथी’, ‘स्टुपिड मन’, ‘ड्रिम्स’, ‘ऐश्वर्य’ र ‘क्याप्टेन’ निर्देशन गरेका छन् ।
