विराटनगर । गिरिजाप्रसाद कोइराला स्मृति चौथो राष्ट्रिय पुरुष हक्की प्रतियोगिताको फाइनलमा विभागीय टोली नेपाल पुलिस क्लब पुगेको छ ।
आइतबार राति विराटनगरको सहिद रंगशालामा भएको खेलमा विभागीय टोली नेपाल पुलिस क्लबले सुदूरपश्चिम प्रदेशलाई ४–० गोल अन्तरमा पराजित गर्दै फाइनलमा पुगेको हो । यस अघि अर्को खेलमा विभागीय टोली त्रिभुवन आर्मी क्लब फाइनलमा पुगी सकेको छ ।
उपाधि जितका लागि विभागीय टोली आर्मी र पुलिसले सोमबार राति खेल्दै छन् ।
पुलिसका सरम बोहरा, महेश धामी, सागर आचार्य, भरत खत्रीले समान १–१ गोल गर्दै टोलीका लागि जित निकालेका थिए । खेलको म्यान अफ द म्याच पुलिसका महेश धामी भए ।
प्रतियोगितामा नेपाल आर्मी, नेपाल पुलिस, कोशी प्रदेश, मधेस प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशको सहभागिता रहेको छ । प्रतियोगिताको विजेताले ७५ हजार, उपविजेताले ४१ हजार र तेस्रो हुने टोलीले २५ हजार रुपैयाँ प्राप्त गर्ने छन् ।
