एसएस राजमौलीको फिल्म ‘आरआरआर’ को नयाँ गीत ‘नाचो नाचो’ उर्फ ‘नाटु नाटु’ ले यसपालि अस्कर अवार्ड जितेको छ। उत्कृष्ट गीतको अस्कर जित्ने यो पहिलो भारतीय गीत हो।
तेलेगु स्टारद्वय रामचरण र एनटिआरबीच छायांकन गरिएको यो गीत प्रेम रक्षितको कोरिओग्राफीमा बनेको हो। यसको ‘फुटस्टेप’ बाट धेरै जना आकर्षित भएका थिए र हुने क्रम जारी छ। यो गीतले गोल्डेन ग्लोब अवार्ड पनि जितेको थियो।
फिल्म रिलिज नहुँदै टिकटक र अरू सामाजिक सञ्जालमा कभर डान्स बनाउनेहरूबीच रामचरण र एनटिआरको फुटस्टेपसँग तालमेल मिलाउने प्रतिस्पर्धा नै चलेको थियो। यो प्रतिस्पर्धामा नेपालका दुई किशोर अरूभन्दा धेरै अघि देखिए।
तेलेगु भर्सनमा वीरगन्जका अभय चौधरी र आयुष चौधरीले कभर भिडिओ बनाएर सार्वजनिक गरेका थिए। भिडिओमा उनीहरूले रामचरण-एनटिआर जोडीको डान्स र आफ्नो डान्स सँगसँगै राखेका छन्। उनीहरूले डान्स स्टेप सिक्न चाहनेका लागि कभर भिडिओ पनि बनाएका छन्। ‘नाटु नाटु ट्युटोरियल’ नाम दिइएको यो भिडिओले अहिलेसम्म एक करोड ५० लाख भ्युज काटिसकेको छ।
