फिल्ममा स्वप्नको जोडी चर्चित गायिका दिक्षिता कार्कीसँग बाँधिने भएको छ । चर्चित भ्लगर तथा संगीतकार चेतन कार्कीकी छोरी रहेकी दिक्षिता अहिलेकी ‘युट्युब सेन्सेसन’ हुन् । ‘जीवन’, ‘तिमी र म’ जस्ता गीत उनका चर्चित छन् । अंग्रेजी गीतको कभर गाएर चर्चामा आएकी उनको युवापुस्तामा गजब फ्यान फलोइंग छ । केही दिनअघि निर्माण टिमले उनीसँग कागजी सम्झौता गरेको हो ।

फिल्मको पात्रमा स्वप्न र दिक्षिता सुहाउने भएकाले मुख्य भूमिकामा अनुबन्ध गरिएको निर्देशक राउतले फिल्मीखबरलाई जानकारी दिए । आफ्नो गायन कलाबाट दुवै युवापुस्तामा लोकप्रिय भएकाले फिल्ममा कलाकारको ‘लाइनअप’ अत्यन्त बलियो देखिएको छ । शहर केन्द्रित कथावस्तुमा निर्माण हुन लागेको फिल्म डिजिटल क्यामेरा इक्विपमेन्ट कम्पनी मल्टी मेटको ब्यानरमा निर्माण हुनेछ ।

निर्देशक राउतले ‘पर्व’, ‘प्रसाद’ र ‘प्रकाश’पछि लभस्टोरी फिल्म निर्देशन गर्न लागेका हुन् । हरेक फिल्ममा फरक प्रयास गरिरहेका उनी यसपटक आफ्नो अघिल्ला लभस्टोरी फिल्मभन्दा फरक बनाउने सोचमा छन् । फिल्मको सम्पूर्ण छायांकन काठमाडौंमा हुनेछ । आगामी बडा दशैंमा प्रदर्शनको लक्ष्य राखिएको फिल्म शहरी सभ्यताभित्रको ढोंग र प्रेमको कथामा निर्माण हुने जानकारीमा छ ।