काठमाडौं, २८ असोज। जापानका लागि प्रस्तावित नेपाली राजदूत जिज्ञानकुमार थापाले जापानको स्थायी आवासीय अनुमति (पीआर) त्यागिसकेको प्रष्टीकरण दिएका छन्। संसदीय सुनुवाइका क्रममा सांसदहरूले पीआरसम्बन्धी प्रश्न उठाएपछि उनले यस्तो बताएका हुन्।
थापाले जापानको पीआर लिएको र त्यसका कारण राजदूत बन्न अयोग्य रहेको भन्दै आफूविरुद्ध उजुरी परेको विषयमा जवाफ दिएका थिए। उनले आफूले पीआर त्यागिसकेको र त्यससम्बन्धी विवरण जापानको अध्यागमन निकायबाट नेपालको परराष्ट्र मन्त्रालयमा प्राप्त भएको जानकारी दिए।
सुनुवाइका क्रममा थापाले जापानमा रहँदा नेपाललाई चिनाउन विभिन्न गतिविधिमा संलग्न भएको पनि बताए। सन् २००० मा जापान गएको उल्लेख गर्दै उनले नेपाली संस्कृति र पहिचान प्रवर्द्धन गर्न ढाकाटोपी लगाएर कार्यक्रम सञ्चालन गर्नेलगायतका काम गरेको सुनाए।
उनले नेपाल र जापानबीचको सम्बन्धलाई थप मजबुत बनाउन आफूले काम गरेको बताउँदै देशकै लागि योगदान गर्ने उद्देश्यले राजदूत पदमा आवेदन दिएको स्पष्ट पारे।
सांसदहरूले थापाको पीआर र राजदूत पदका लागि योग्यतासम्बन्धी विषयमा प्रश्न गरेका थिए। जवाफमा उनले जापानमा रहेका आफ्ना श्रीमती र सन्तान नेपाली नागरिककै हैसियतमा रहेको बताए।
थापाको प्रष्टीकरणसँगै संसदीय सुनुवाइमा उनको पीआरसम्बन्धी विषयले चर्चा पाएको छ। राजदूत नियुक्तिसम्बन्धी प्रक्रिया अघि बढिरहेका बेला उनको नागरिकता, स्थायी आवासीय अनुमति त्यागेको विवरण र नियुक्तिसम्बन्धी कानुनी प्रावधानबारे उठेका प्रश्नहरू सुनुवाइका प्रमुख विषय बनेका छन्।
प्रतिक्रिया दिनुहोस