पर्वत, १ असार । पर्वतको कुश्मा नगरपालिका–३ दुर्लुङबासीका लागि शनिबारको रातमा परेको मुसलधारे बर्षा काल बनेर आयो । गाउँमाथि जंगलबाट आएको पहिरोले तुलबहादुर थापा र कमला बिकको घर मात्रै बगाएन दुई परिवारका ८ जनाको मृत्यु नै भयो भने एक जना पहिरोमै हराइरहेका छन । दुर्लुङमा शनिबार साँझदेखि मुसलधारे पानी पर्न थालेको थियो । पानीसँग सवा आठ बजेतिर दुर्लुङकोटको पाखोबाट खसेको पहिरोले तुलबहादुर र कमलाको घर बगाए लग्यो । उनीहरूसँगै जोडिएको भुवन गिरीको घरको आधा भाग पनि पहिरोले लगेको छ ।
पहिरोमा परी ६२ वर्षीय तुलबहादुर थापा, उनकी ५८ वर्षीया पत्नी मीनकुमारी, ३४ वर्षीया छोरी दिर्पा थापा, नातिहरू १५ वर्षीय विवेक र १४ वर्षीय सम्राट तथा ११ वर्षीया नातिनी विदिशाको मृत्यु भएको छ । तुलबहादुरकै छिमेकी कमला विक र उनकी आठ वर्षीया छोरी जेनिशाले पनि ज्यान गुमाएका छन् । कमलाका १२ वर्षीय छोरा जेनिश बेपत्ता छन् । उनका श्रीमान् विकास विक वैदेशिक रोजगारीका क्रममा साउदीमा छन् ।
तुलबहादुरकी छोरी दिर्पा लकडाउनका कारण छोरो विवेकको एसइई परीक्षा अनिश्चित भएपछि माइतीमा बस्न आएका थिइन् । बाग्लुङको जैमिनी नगरपालिका पैञ्यु थन्थाप घर भएकी उनी छोरालाई पढाउन कुश्मा बजारमा डेरा गरी बस्थिन् । सुरुमा उनले छोरालाई घर पठाएर आफू माइत आएकी थिइन् । एक हप्ताअघि मात्रै न्यास्रो लागेको भन्दै सवारी पास बनाएर उनले छोरालाई पनि मामाघर बोलाएकी थिइन् ।
उनीहरूसँगै ज्यान गुमाएका सम्राट र विदिशा तुलबहादुरको छोरापट्टीका नाति–नतिना हुन् । तुलबहादुरका छोरा अम्मर र बुहारी रिमाया करिब पाँच सय मिटर टाढा बनाएको नयाँ घरमा बस्थे । त्यहीं उनीहरूले सामान्य किराना पसल र होटेल व्यवसाय पनि गर्छन् ।
उनीहरूका छोराछोरी सम्राट र विदिशा दिनभरि आमाबुबासँगै रहे पनि सुत्न भने हरेक दिन हजुरबुबा–हजुरआमासँगै जान्थे । ‘हजुरबुबा र हजुरआमाले धेरै माया गर्ने भएकाले केटाकेटीहरू सुत्न सधैँ पुरानै घर आउने गरेका थिए । लाउँलाउँ र खाउँखाउँ उमेरका दुई छोराछोरीको मृत्यु देख्नुपर्यो अभागी बाबुआमाले,’ तुलबहादुरका छिमेकी सूर्यबाबु गिरीले भने ।नयाँपत्रिका दैनिकबाट
