काठमाडौं । नेकपा एमालेका सांसद गोकुल बास्कोटाले राजीनामा दिन उपसभामुखलाई सुझाव दिएका छन् । प्रतिनिधिसभाको मंगलबार बसेको बैठकमा विशेष समय लिएर बोल्दै यति धेरै प्रश्न उठेपछि राजीनामा दिएर सबैलाई जवाफ दिन सुझाव दिएका हुन् ।
दोषी हो वा होइन कानुन वा कुनै छानबिन भए त्यसले देखाउने उनले बताए । संसदको बैठकको सुरुमै रास्वपाले विशेष समय लिएर संवैधानिक परिषदबाट बहुमत पुर्याउन उपसभामुखलाई हटाउन खोजिएको भन्दै आपत्ति जनाएको थियो । त्यसो गरिए लोकतन्त्रको हत्या हुने भन्दै रास्वपा प्रमुख सचेतक सन्तोष परियारले आप्पत्ति जनाएका थिए ।
एमाले सांसद बास्कोटाले भने लोकतन्त्रमा सबैमाथि प्रश्न उठाउन पाउने बताए । साथै जसलाई नैतिकताको कसीमा जाँचिनु छ, उसले चुनौती दिने अवसर पनि लोकतन्त्रमा हुने बताए । ‘प्रश्न उठ्नु र जवाफदेहीता चाहिन्छ भन्नु लोकतन्त्रको हत्या होइन’, सांसद बास्कोटाले भने, ‘लोकतन्त्रलाई थप बलियो बनाउन मदत पुग्छ ।’
प्रणाली, व्यक्तिको आचरण वा पदिय दायित्वमा रहेर गर्नु पर्ने काममा प्रश्न उठे पद छोड्नुपर्ने उनले बताए । ‘सांसदहरुबारे प्रश्न उठ्यो भने के गर्ने भन्ने कानुन नियम बनाउँ न’, बास्कोटाले भने, ‘व्यक्तिगत रुपमा निरन्तर पीडित हुनुभन्दा खुला किताब र सबैको निम्ति पारदर्शिता प्रदर्शन गर्न मार्गप्रशस्त गरे हुन्छ ।’
