काठमाडौं । राष्ट्रिय स्वतन्त्र पार्टी (रास्वपा)ले संस्थापक महामन्त्री डा. मुकुल ढकाललाई साधारण सदस्य समेत नरहनेगरी कारबाही गरेको छ ।
पार्टी सभापति रवि लामिछानेका कमजोरी औंल्याएर समीक्षा प्रतिवेदन बनाएपछि पार्टीको महामन्त्री, प्रवक्ता र केन्द्रीय सदस्य पदबाट निस्कासित भएका महामन्त्री ढकाललाई त्यसपछिका अभिव्यक्तिका आधारमा साधारण सदस्यताबाट निस्कासित गरेको हो ।
केन्द्रीय अनुशासन समितिको प्रतिवेदनका आधारमा केन्द्रीय समितिबाट निर्णय गरेको रास्वपाले जनाएको छ । महामन्त्री डा. ढकालले भने आफूले दिएका स्पष्टीकरण केन्द्रीय कार्यालयमा दर्ता गरेको जानकारी समेत आफूलाई नदिएको भन्दै पटक–पटक दर्ता गरेको प्रमाण मागिरहेका छन् ।
पार्टी विधान र कानुनको व्यवस्था विपरीत कारबाही गरिएको भन्दै ढकालले निर्वाचन आयोगमा उजुरी दिएका छन् । उजुरीमा प्रक्रियामा त्रुटि देखिने कारबाहीको निर्णय नै रद्ध हुने भएपछि रास्वपाले डा.ढकाललाई कारबाहीको प्रमाण दिएको छैन ।
डा. ढकाल भने पार्टी सभापति रवि लामिछानेका विभिन्न गैरकानुनी काम र त्यसबाट बनेको छविका कारण रास्वपा दुर्घटनाको संघारमा रहेको भन्दै लामिछाने र उनको क्लवबाट रास्वपालाई जोगाउनुपर्ने नारासहित विद्रोहमा छन् ।
