हेटौंडा । बागमती प्रदेशका नवनियुक्त प्रदेश प्रमुख दीपकप्रसाद देवकोटाले पदभार ग्रहण गरेका छन् । शुक्रबार प्रदेश प्रमुख कार्यालयमा उनले पदभार ग्रहण गरेका हुन् ।
साउन १४ गते बसेको मन्त्रिपरिषद् बैठकको सिफारिसमा राष्ट्रपति रामचन्द्र पौडेलले देवकोटालाई प्रदेश प्रमुखमा नियुक्त गरेका थिए । देवकोटाले बिहीबार पौडेलबाट पद तथा गोपनीयताको शपथ ग्रहण गरेका थिए ।
सरकारले निवर्तमान प्रदेश प्रमुख यादवचन्द्र शर्मालाई हटाएर देवकोटालाई नियुक्त गर्ने निर्णय गरेको थियो । देवकोटा एमालेका केन्द्रीय अनुशासन आयोगका सदस्य रहेका थिए भने उनी धनगढीका स्थानीय हुन् । देवकोटा बागमती प्रदेशका चौथो प्रदेश प्रमुख हुन् ।
सोही अवसरमा निवर्तमान प्रदेश प्रमुख शर्माको बिदाइ समेत गरिएको छ । ३ वर्ष प्रदेश प्रमुखको जिम्मेवारीमा रहेका शर्मा एकीकृत समाजवादी निकट हुन् । शर्मा २०७८ भदौ ४ मा प्रदेश प्रमुखमा नियुक्त भएका थिए ।
समारोहमा प्रदेशका मुख्यमन्त्री बहादुर सिंह लामा, सभामुख भुवनकुमार पाठक, प्रदेशका मन्त्री तथा सचिवहरू र कर्मचारीहरूको उपस्थिति रहेको थियो ।
