हास्य टिभी सिरियल ‘सक्किगोनि’ टिमले फिल्म ‘लाज शरणम्’ निर्माणको औपचारिक घोषणा गरेको छ। शुक्रबार कुमार कट्टेल जिग्री को जन्मदिनको अवसर पारेर काठमाडौंमा आयोजित कार्यक्रममा फिल्मका कलाकार र निर्देशकबारे जानकारी दिइयो। सिरियल निर्माणमा लागेको एक दशकपछि जिग्री र पाँडे को टिमले फिल्म बनाउन लागेको हो।
जेपीटी क्रियशनबाट बन्न लागेको फिल्मलाई कुमारले निर्देशन गर्ने भएका छन्। उनकै लेखन रहेको फिल्ममा ‘सक्किगोनि’ टिमबाट सागर लम्साल ‘बले’, अर्जुन घिमिरे पाँडे र कमलमणि नेपालको अभिनय रहने तय छ।
त्यस्तै माला लिम्बु, मुकुन्द श्रेष्ठ, विजय बराल र देशभक्त खनालको पनि शीर्ष भूमिकामा अभिनय रहनेछ। पुराना अभिनेता मुकुन्दले यो फिल्मबाट पुनरागमन गर्न लागेका हुन्। भदौं तेस्रो सातादेखि छायांकनमा जाने तयारीमा रहेको फिल्मको निर्मातामा नविन श्रेष्ठ र रामनरेश शाह छन्।
महाशिवरात्रिको अवसर पारेर फागुन १४ गतेदेखि फिल्मलाई प्रदर्शनमा ल्याइने जनाइएको छ। कार्यक्रममा निर्देशक कुमार कट्टेलले जिम्मेवार भएर राम्रो फिल्म बनाउन मेहनत गर्ने बताए।
