गुल्मी । चन्द्रकोट गाउँपालिकामा जिल्लामै पहिलोपटक कपडा बैंक स्थपना भएको छ । चन्द्रकोट गाउँपालिकाका अध्यक्ष युवराज केसीले शान्तिपुर बसपार्कमा राखिएको संकलन बक्स खोली बैंकको शुभारम्भ गरेका हुन् । उद्योग वाणिज्य संघ शान्तिपुरको सहयोगमा कपडा बैंक स्थापना गरिएको हो ।
मानवीय कार्यअन्तर्गत कपडा बैंकको स्थापना गरिएको उद्योग बाणिज्य संघ शान्तिपुरका अध्यक्ष तेजेन्द्र थापाले बताए । उनले सबैले आफ्ना पुराना कपडाहरू कपडा बैंकमा जम्मा गरी पर्यावरणमा पर्ने नकरात्मक असरलाई समेत न्यूनीकरण गर्न सकिने बताए।
चन्द्रकोट गाउँपालिका अध्यक्ष केसीले यो कार्य निकै प्रसंसनीय र परोपकारी भएको हुँदा गुल्मीमा सम्पूर्ण पालिकाहरुमा कपडा बैंक आवश्यकता रहेको बताए । उनले भौतिक विकाससँगै सामाजिक विकास, मानवीय विकास र चेतनाको विकास हुनुपर्ने बताए ।
कपडा बैंकका संचालक कमल जिसीले बैंक संचालन भएको चार महिनाको अवधिमा ७०० घरपरिवार आगोलागी पीडितहरू कपडा प्रदान गरिएको बताए ।
चन्द्रकोट गाउँपालिकाको बसपार्कस्थित संकलन बक्स राखिएको छ भने संकलित कपडाहरुलाइ पुन: प्रशोधन (रि-साइकल) गरी आवश्यकताका आधारमा वितरण गरिने चन्द्रकोट गाउपालिका वडानम्बर-२ का वडाध्यक्ष कमल केसीले बताए ।
क्लोथ एण्ड फूड बैंक नेपालले आगामी २०८२ सम्ममा देशैभर फूड एम्बुलेन्स समेत संचालन गर्ने गरी अभियान चलाएको छ । अहिलेसम्म १६० भन्दा बढी स्थानीय सरकार यो अभियानमा जोडिएका छन् ।
