काठमाडौं । पाँच किलो सुनसहित त्रिभुवन अन्तर्राष्ट्रिय विमानस्थलबाट दुई जना भारतीय नागरिक पक्राउ परेका छन् । फ्लाई दुबईबाट आइतबार साँझ पौने ७ बजे आएका भारतीय नागरिक सुरेश कुमार र मोहन कुमार गणेशन सुनसहित पक्राउ परेका हुन् ।
लगाएको कपडामा सुनको लेप लगाएर उनीहरु काठमाडौं ओर्लिएका थिए । चेक जाँच गर्ने क्रममा उनीहरुले लगाएको लुगामा लेपन गरिएको अवस्थामा सुन भेटिएको विमानस्थल सुरक्षा कार्यालयका प्रहरी प्रमुख एसएसपी कृष्णहरि शर्मा ले बताए ।
सुरेशकुमारको साथबाट २ किलो ६ सय ग्राम र गणेशनको साथबाट २ किलो पाँच सय ग्राम सुन बरामद गरिएको विमानस्थल प्रहरीले जनाएको छ । सुरेशकुमारले लगाएको टिसर्ट, पेन्टी र जिन्स पाइन्टमा लेपन पेस्ट गरिएको अवस्थामा २ किलो ६ सय ग्राम सुन बरामद भएको थियो ।
