काठमाडौं । यो वर्ष अभिनेत्री नम्रता श्रेष्ठको लागि उतारचढावपूर्ण रह्यो । उनको पछिल्लो फिल्म ‘जाइरा’ चार वर्षअघि रिलिज भएको थियो । यतिबेला भने उनी काममा फर्किएकी छन् ।
सामाजिक कथावस्तुमा बनेको छोटो एनिमेटेड फिल्म ‘मेरिओनेट्स’मा नम्रताले भ्वाइस एक्टरको भूमिकामा काम गरेकी हुन् । सोमबार सार्वजनिक भएको यो फिल्म सेयर गर्दै उनले उत्साह व्यक्त गरेकी छन् ।
उनी लेख्छिन्, ‘म एउटा एनिमेटेड छोटो फिल्म : मेरिओनेट्सको लिंकलाई सेयर गर्न पाउँदा उत्साहित छु, जसमा मेरो आवाज प्रस्तुत छ । यो हृदयस्पर्शी कथाले सानै उमेरमा विवाह गर्दा महिलाको मानसिक स्वास्थ्य र अन्तरपुस्तामा पार्न सक्ने असरबारे केही कुरा भनेको छ । छोरीले यस्ता चुनौतीको सामना गर्दा हुने समस्यालाई यो फिल्मले पेश गरेको छ ।’
प्राज्निक अवस्थी निर्देशित छोटो एनिमेटेड फिल्ममा नम्रता र अनुष्का पाण्डेको स्वर छ । जेसन कुँवरले संगीत दिएका छन् । अष्ट्रेलिया स्क्रिन क्यानबेरा नामक कम्पनीसँग मिलेर यो छोटो फिल्म निर्माण भएको हो । केही अन्तर्राष्ट्रिय फिल्म फेस्टिभलमा समेत यो फिल्म छनोट भइसकेको छ ।
फिल्ममा नम्रताले आमाको क्यारेक्टरमा आवाज दिएकी छन् भने अनुष्काले छोरीको भूमिकामा आवाज दिएकी छन् । उनले पछिल्लो पटक बर्लिन फिल्म फेस्टिभलको अन्तर्राष्ट्रिय प्रतिस्पर्धा विधामा छनोट भएकोमा ‘शाम्बाला’ निर्देशक मीनबहादुर भामलाई बधाई दिएकी थिइन् ।
