काठमाडौँ । चालु आर्थिक वर्ष २०८०-८१ को दोस्रो त्रैमासमा नेपाल टेलिकमको कूल आय घटेको तथ्याङ्क सार्वजनिक भएको छ । गत आर्थिक वर्ष २०७९-८० को पुस मसान्तसम्मको अवधिमा ७९ करोड १७ लाख ५७ हजार रुपैयाँले कूल आय घटेको हो ।
टेलिकमले गत आर्थिक वर्षको दोस्रो त्रैमासमा २२ अर्ब १० करोड ११ लाख ३७ हजार रुपैयाँ आम्दानी गरेको थियो । चालू आर्थिक वर्षको सोही अवधिमा भने २१ अर्ब ३० करोड ९३ लाख ७९ हजार रुपैयाँ मात्रै आम्दानी भएको टेलिकमले जनाएको छ । यो गत वर्षको यही अवधिको तुलनामा ३.५८ प्रतिशतले कम हो ।
यस्तै, दोस्रो त्रैमाससम्ममा १७ अर्ब २४ करोड ६७ लाख ७९ हजार रुपैयाँ सञ्चालन आम्दानी रहेको बताइएको छ । गत आर्थिक वर्षको सोही अवधिमा १८ अर्ब ७ करोड ७३ लाख ४८ हजार रुपैयाँ सञ्चालन आम्दानी गरेको थियो । यो ८३ करोड ५ लाख ६९ हजार रुपैयाँले न्यून हो ।
सबैजसो आम्दानी घटेपछि टेलिकमको खुद नाफामा समेत गिरावट आएको छ । यस अवधिमा टेलिकमको खुद नाफा ३२ करोड ३३ लाख ७३ हजार रुपैयाँले घटेको छ । चालू वर्षको दोस्रो त्रैमासमा ३ अर्ब ९३ करोड १४ लाख ३ हजार रुपैयाँ खुद नाफा रहेकामा गत आर्थिक वर्षको सोही अवधिमा ४ अर्ब २५ करोड ४७ लाख रुपैयाँ खुद नाफा थियो । यो चालू वर्षको तुलनामा ७.६० प्रतिशतले बढी हो ।
यस अवधिमा कम्पनीको प्रति शेयर आम्दानी यस त्रैमासिक अवधिमा ४३.६८ रुपैयाँ रहेको जनाइएको छ । नाफादेखि सबै सूचक घट्नुमा ओटीटी सेवाको बढ्दो प्रयोग रहेको टेलिकमले बताएको छ । अन्तरआबद्धतामा गत आर्थिक वर्षको तुलनामा चालू वर्षको दोस्रो त्रैमाससम्ममा ५२ करोड ९२ लाख ७५ हजारले कमी आएको छ ।
यस्तै, आम्दानीदेखि सञ्चालन आय र नाफा घट्नुको अन्य कारणकारुपमा बिजुलीका असहज आपूर्ति, दुर्गम तथा विकट क्षेत्रमा कम प्रतिफलमा सेवा विस्तार लगायतका कारण समेत रहेको बताइएको छ ।
