काठमाडौं । पति हत्याको अभियोग लागेकी प्रसिद्ध उपन्यासकार सान्ड्रा हलबारेको फिल्म ‘एनाटोमी अफ अ फल’ले जारी कान्स फिल्म फेस्टिभलको शीर्ष पुरस्कार ‘पाम डी ओर’ जितेको छ । जस्टिन ट्रिएट निर्देशित यो फिल्मले उनीहरुको विवाह र निजी जीवनका सूक्ष्म पक्षलाई पनि दर्शकसामु पेश गर्छ ।

कान्सको पाम डी ओर जित्ने उनी तेस्रो महिला निर्देशक हुन् । यसअघि जेन क्याम्पियनले ‘द पियानो’ र हेल्मर जुलिया डुकोर्नाउले ‘टाइटेन’बाट यो पुरस्कार जितेका छन् । उनले प्रतिस्पर्धामा रहेका अन्य २१ फिल्मलाई उछिन्दै यो शीर्ष पुरस्कार जितेकी हुन् । रुबेन ओसलुण्ड जुरी प्रमुख रहेको कान्सले उक्त फिल्मलाई पाम दे ओर दिने निर्णय गरेको हो ।

बेलायती निर्देशक जोनाथन ग्लेजरको ‘जोन अफ इन्ट्रेस्ट’ले दोस्रो शीर्ष पुरस्कार ग्राण्ड प्रिक्स जित्यो । यो फिल्मले दोस्रो विश्वयुद्धको क्रममा एक जर्मनी सैनिक कमाण्डरको कथा पेश गर्छ । अंग्रेजी महिनाको १६ देखि २७ सम्म चलेको फेस्टिभलमा उत्कृष्ट निर्देशकको अवार्ड भने भियतनामी फ्रेन्च निर्देशक ट्रान आन हुङले जिते । १९ औं शताब्दीको पृष्ठभूमिमा तयार भएको प्रेमकथामा जुलियट बिनोचेले अभिनय गरेकी छन् ।

११ दिनसम्म चलेको फेस्टिभलमा मार्टिन स्कोरसिज निर्देशित ‘द किलर्स अफ द फ्लावर मुन’ लगायत चर्चित फिल्मलाई प्रिमियर गरिएको थियो । यसपटक लियोनार्दो डिकाप्रियो, रोबर्ट डी नीरो, सिन पेन, क्वान्टिन टोरेन्टिनोसहित विश्व फिल्म, फेसन र संगीतका चर्चित सेलिब्रिटीले कान्समा भाग लिएका थिए ।

विजयी सूची :-

पाम डी ओर : एनाटोमी अफ अ फल (जस्टिन ट्रिएट)

ग्रान्ड प्रिक्स : जोन अफ इन्ट्रेस्ट (जोनाथन ग्लेजर)

निर्देशक : ट्रान एन हङ (द पोट औ फेउ)

अभिनेता : कोजी याकुशो (परफेक्ट डेज)

अभिनेत्री : मर्वे डिजदार (अबाउट माइ ग्रेसेज)

जुरी पुरस्कार : फलन लिभ्स (अकी कौरिस्माकी)

पटकथा : साकामोटो युजी (मोन्स्टर)