काठमाडौँ । अभिनेत्री केकी अधिकारी लामो समयदेखि फिल्म क्षेत्रमा सक्रिय छिन् । उनका फिल्म पनि लगातार आइरहेका छन् । गतबर्षकै कुरा गर्ने हो भने उनको फिल्म ‘झिङ्गेदाउ’ आएको थियो ।
फिल्मले राम्रो व्यवसाय समेत गर्यो । यसै फिल्मबाट केकीले शुक्रवार आयोजित ‘सिने सर्कल अवार्ड’ मा उत्कृष्ट अभिनेत्रीको अवार्ड समेत जितिन् ।
तर, आइतबार सोल्टी होटेलमा आयोजित ११ औँ नेफ्टा फिल्म अवार्डको उत्कृष्ट अभिनेत्रीको सूचीमा भने उनी उत्कृष्ट ५ भित्र समेत अटाउन सकिनन् । अवार्डका उत्कृष्ट ५ सूचीमा स्वस्तिमा खड्का, अरुणा कार्की, सृष्टि श्रेष्ठ, मेनुका प्रधान, मिरुना मगर परेका छन् ।
केही दिन अगाडि एक अवार्डमा उत्कृष्ट अभिनेत्री बनेकी केकी नेफ्टाको मनोनयनमा नपर्दा सबैको खुलदुलीको विषय बन्ने नै भयो । यसै फिल्मबाट निर्देशक निर्देशक ज्ञानेन्द्र देउजा भने उत्कृष्ट ५ भित्र अटाएका छन् ।
हुन त प्रत्येक अवार्डको आयोजक र जुरी फरक फरक हुन्छन् । त्यसका हिसाबले अवार्ड पाउनु नपाउनु फरक कुरो हो ।
तर एक अवार्डमा उत्कृष्ट भएकी अभिनेत्री अर्को अवार्डमा नोमिनेसनमा नपर्नु भनेको अनौठो भएको कतिपयको भनाइ छ ।
