काठमाडौँ । आदिवासी खेलकुद सङ्घ नेपालको प्रथम साधारण सभाले भूपेन्द्र गुरुङलाई अध्यक्षमा निर्विरोध निर्वाचित गरेको छ । साधारण सभाले भूपेन्द्रको अध्यक्षतामा ९ सदस्यीय केन्द्रीय कार्यसमिति निर्विरोध निर्वाचित गरेको हो ।
निर्वाचित कार्यसमितिको कार्यकाल २ वर्षको हुनेछ । नेपाल उमा कुङ्फु सङ्घका महासचिवसमेत रहेका भूपेन्द्र जर्मनीमा भएको वर्ल्ड मार्सल आर्टस गेम्स तथा इङ्गल्यान्डमा भएको युरोपियन च्याम्पियनसिपका स्वर्ण पदक विजेता पनि हुन् ।
नवनिर्वाचित केन्द्रीय कार्यसमितिमा दिपेन गुरुङले उपाध्यक्ष, सुरेश मगरले सचिव र मीनबहादुर गुरुङले कोषाध्यक्षको जिम्मेवारी पाएका छन् । सदस्यमा शेरबहादुर गुरुङ, धनबहादुर गुरुङ, जगदीश गुरुङ, रुपकाजी मगर र गुना गुरुङ चयन भए ।
साधारण सभाले नेपाल उमा कुङ्फु सङ्घका सहायक मुख्य प्रशिक्षक एवं अन्तर्राष्ट्रिय निर्णायक उद्धव थापा मगरलाई संघको मुख्य प्रशिक्षकमा मनोनीत गरेको छ । नवनिर्वाचित पदाधिकारीलाई राष्ट्रिय खेलकुद परिषद्की बोर्ड सदस्य नन्दा बस्याललगायतले बधाई सहित प्रमाणपत्र वितरण गरे । अध्यक्ष गुरुङले खासगरी परम्परागत खेलको जगेर्ना गर्ने उद्देश्यले सङ्घ स्थापना गरिएको बताए ।
