काठमाडौं । तपाईंलाई नाटकमा रुचि छ भने शुक्रबारदेखि सहरमा दुई नयाँ नाटकले मञ्चन सुरु गर्दैछन् । सिनामंगलस्थित पुरानो घरमा नयाँ नाटक ‘चे इज ब्याक’ मञ्चन सुरु हुँदैछ भने थापागाउँस्थित मण्डला थिएटरमा नयाँ नाटक ‘जून’ मञ्चन हुँदैछ ।
मण्डलामा सुरु हुने नाटक ‘जून’ले सानै उमेरमा आमा गुमाएकी एक पात्रको कथा भन्छ । आमा गुमाएपछि सौतेनी आमा र दुई बहिनीसँग बस्दै आएकी उनीसामु नयाँ घर बसाउनुपर्ने बाध्यता छ । यो परिस्थितिमा उनले रुचि र सपनासँग सम्झौता गर्नुपर्ने परिस्थिति आइलाग्छ । समयको गतिमा जून पात्रले आत्मनिर्णयको लागि नयाँ यात्रा थाल्छिन् । अनि कथा कसरी अघि बढ्छ ? यो वरपर नाटक ‘जून’ घुमेको छ ।
नम्रता केसीको डिजाइन, निर्देशन र कोरियोग्राफी रहेको यो नाटकलाई संयोग गुरागाईंले लेखेका हुन् । वैशाख २४ गतेसम्म यो नाटक मण्डला थिएटरमा मञ्चन हुने जनाइएको छ ।
यसैबीच, जेठ ७ गतेसम्म सिनामंगलस्थित पुरानो घरमा नयाँ नाटक ‘चे इज ब्याक’ पनि मञ्चन हुनेछ । सुलक्षण भारतीको लेखन रहेको यो नाटकलाई कुन्दन थारुले निर्देशन गर्नेछन् । पारिवारिक कथावस्तुमा तयार पारेको यो नाटकलाई दर्शकले रुचाउने विश्वास पुरानो घर थिएटरले लिएको छ ।
