काठमाडौँ । हास्य कलाकार केदार घिमिरे (माग्ने बुढा) को जन्मदिनको अवसरमा आयोजित कार्यक्रममा कलाकार शिवहरि पौडेलले कलाकार घिमिरेले जुन कुरामा हात हाले पनि सफलता मात्रै हात लाग्ने भन्दै प्रशंसा गरेका छन् । कलाकार पौडेलले घिमिरेले जुन फिल्ममा खेले पनि सफलता मात्रै हात लाग्ने र घिमिरेको फिल्म हेर्न जाने मान्छेको कमी नहुने उनको भनाई थियो ।
उनले कलाकार घिमिरे कलाकारिताको उच्च तहमा पुगिसकेको र त्यहाँबाट तल झर्ने स्थिति नहोस् भन्दै जन्मदिनको शुभकामना दिए । उनले कलाकार घिमिरेले चलचित्र र कलाकारितामा दिएको योगदानले हास्य कलाकारको कद झनै बढ्दै गएको पनि बताए ।
कार्यक्रममा कलाकार किरण केसीले आफूसँग काम गर्दाको अनुभवलाई सम्झिँदै उनको प्रशंसा गरे । उनले कलाकार घिमिरेले कलाकारिता सुरुवात गर्दा आफूलाई धेरै सहयोग गरेको बताए । कलाकार घिमिरे शालीन, भद्र र सकारात्मकता भएको व्यक्तिको रूपमा उनलाई चित्रित गरे । उनले हास्य कलाकारहरूको प्रतिस्पर्धा रहे पनि एउटालाई दुःख पर्दा अर्कोले सहयोग गर्ने भावना हास्य कलाकारहरूमा मात्रै रहेको बताए ।
कार्यक्रममा कलाकार घिमिरेलाई जन्मदिनको शुभकामना दिँदै कलाकार दीपकराज गिरीले घिमिरेको संघर्षबाट नै आज यो स्थान हासिल गर्न सफल भएको बताए । उनले आफूले घिमिरेसँग चलचित्रमा सहयात्रा गरेको १० वर्ष भएको बताए । उनले आफूलाई मानसिक रूपमा, भौतिक रूपमा, चलचित्र लेखन लगायतका क्षेत्रमा साथ दिँदा आफूलाई झनै राम्रो भएको र यात्रा अझै अघि बढ्ने विश्वास व्यक्त गरे ।
कार्यक्रममा कलाकार दीपाश्री निरौलाले कलाकार घिमिरे जस्तोसुकै परिस्थितिमा पनि सल्लाह र सुझाव दिने गरेको बताए । उनले घिमिरे र आफ्नो चलचित्रको सहयात्रा १० वर्ष पुगिसकेको र कलाकार घिमिरे एउटै पात्रमा आधारित रहेर आफ्नो परिचय दिनसक्ने व्यक्ति भएको भन्दै प्रशंसा गरे ।
कार्यक्रममा कलाकार केदार घिमिरेले चलचित्रको सहयात्रा र आफ्नो पात्रले अहिलेसम्म दर्शकलाई मनोरञ्जन दिन सकेकोमा खुसी व्यक्त गरे । उनले आगामी दिनमा झनै मनोरञ्जनात्मक चलचित्रहरू पस्किने प्रतिबद्धता जनाए । कलाकार घिमिरेको जन्म दिनको अवसरमा आयोजित कार्यक्रममा पुगेका अन्य कलाकारहरूले पनि कलाकार घिमिरेलाई जन्मदिनको शुभकामना व्यक्त गरेका थिए ।
