एजेन्सी। पाकिस्तानमा महँगीले सर्वसाधारणको जीवन कष्टकर बनाएको छ । अवस्था यस्तो छ कि महँगीले विगत ५० वर्षको कीर्तिमान तोडेको छ ।
सरकार र विभिन्न संस्थाले दिएको खानेकुरा लिन र लुट्न जताततै मानिसको भीड देखिन्छ । तथ्यांक अनुसार खाद्यान्न लुटपाटका कारण भएको भागदौडका घटनामा पछिल्लो १० दिनमा २० जनाको ज्यान गएको छ ।
मार्चमा पाकिस्तानमा मुद्रास्फीति दर ३५.३७ प्रतिशत रहेको छ । पाकिस्तान सरकारले आईएमएफबाट बेलआउट प्याकेज पाउन नसकेपछि यस्तो अवस्था आएको बताइएको छ ।
शनिबार सार्वजनिक भएको सरकारी तथ्याङ्क अनुसार महिनाको आधारमा मुद्रास्फीति दर ३ दशमलव ७२ प्रतिशत रहेकोमा गत वर्षको औसत मुद्रास्फीति २७ दशमलव २६ प्रतिशत रहेको थियो । पाकिस्तानको आर्थिक उथलपुथलको मार पाकिस्तानका जनताले भोगिरहेका छन् ।
कराचीकी विश्लेषक शाहिदा विजरातले भनिन्, “जसरी मुद्रास्फीति बढ्दै गएको छ, त्यसले भोकमरीको अवस्था सिर्जना भइरहेको छ भन्ने मलाई विश्वास छ।”
पाकिस्तानको दक्षिणी सहर कराँचीमा शुक्रबार रमजानको समयमा खाद्यान्न वितरण गर्ने कारखानामा भीडका कारण कम्तीमा १२ जनाको मृत्यु भएको छ । पाकिस्तानको यो आर्थिक संकटका कारण जनजीवन कष्टकर बनेको छ ।
उच्च मुद्रास्फीति, घट्दो विदेशी मुद्रा सञ्चिति र फराकिलो चालु खाता घाटाले पाकिस्तानले बढ्दो आर्थिक चुनौतीहरूको सामना गरिरहेको छ।आयातमा प्रतिबन्ध लगाएर व्यापार घाटा कम गर्ने प्रयासका कारण पाकिस्तानमा बेरोजगारी संकट तीव्र गतिमा बढिरहेको छ ।
समाचार पत्र डनको रिपोर्ट अनुसार कच्चा पदार्थको अभावका कारण ठूलो संख्यामा कम्पनीहरूले उत्पादन घटाइरहेका छन् वा सञ्चालन बन्द गरिरहेका छन्। हालैका महिनाहरूमा, दर्जनौं कम्पनीहरूले उत्पादन बन्द गर्न नोटिस जारी गरेका छन्।
प्रतिवेदनमा व्यापार सन्तुलन सुधार गर्न कच्चा पदार्थको आयातमा रोक लगाउनुले ठूलो सङ्कट निम्त्याइरहेको उल्लेख गरिएको छ ।
