यदि कुनै जोडीलाई दर्शकले फिल्ममा हेर्ने इच्छा पालेका छन् भने त्यो प्रदीप खड्का र नीति शाह हुन् । केही विज्ञापनमा एकसाथ काम गरिसकेका उनीहरुले अब लगातार फिल्ममा काम गर्ने सम्भावना बढेको छ । लकडाउनभन्दा अगाडि नीतिले फिल्म ‘हुतुत’ सम्झौता गरेकी थिइन्, जसमा प्रदीप पनि ‘फाइनल’ छन् । नयाँ फिल्म ‘एक्स ९’मा पनि उनीहरुको जोडी बाँधिने निश्चित प्रायः छ ।
यसबीच, प्रदीपले अभिनय गर्न लागेको नयाँ फिल्म ‘कामिनो’मा पनि नीतिको प्रवेश हुने सम्भावना बलियो देखिएको छ । निर्देशक दीपक वलीले उनीसँग केही चरण कुराकानी गरिसकेका छन् । नीति कथावस्तु र आफ्नो चरित्रलाई लिएर सकारात्मक रहेको र केही दिनमा कागजी सम्झौता हुनसक्ने स्रोत बताउँछ । सोमबार पनि फिल्मको टिम र नीतिबीच छलफल हुने जानकारी प्राप्त छ ।
फिल्ममा डेब्यूका लागि डेढ महिनादेखि नीतिले कलाकार अनुप बरालबाट अभिनय सिकिरहेकी छन् । करिअरको सुरक्षित उडान भर्न अहिलेका दुई सुपरस्टार अनमोल केसी र प्रदीप खड्काको फिल्मबाट डेब्यू गर्ने उनको इच्छा छ । ‘एक्स ९’मा अनमोलसँग उनले काम गर्ने निश्चित थियो । तर, निर्माणमा ढिलाई भएको भन्दै अनमोलले हात झिकेपछि फिल्ममा प्रदीपले काम गर्ने चर्चा छ ।
‘कामिनो’मा प्रदीपसँगै राजबल्लभ कोइराला र वर्षा सिवाकोटी पनि अनुबन्ध भैसकेका छन् । नेपालका साथै ब्राजिल र मेक्सिकोमा छायांकन हुने फिल्मको कार्यकारी निर्माता सुनिल विष्ट गौली हुन् भने पटकथा तथा संवाद महेश दवाडीले लेखेका हुन् । नेपाली, हिन्दी, अंग्रेजी र स्पेनिस भाषामा रिलिज हुने फिल्मले जोखिमपूर्ण तरिकाले अमेरिका प्रवेश गर्न चाहनेको संघर्षको कथा बोल्नेछ ।
