बलिउडको ‘लभ बर्ड्स’ सिद्धार्थ मल्होत्रा र कियारा आडवाणी विवाह बन्धनमा बाँधिएका छन् । फिल्म ‘शेरशाह’बाट सुरु भएको उनीहरुको प्रेम सम्बन्ध मंगलबार विवाहमा परिणत भएको हो । जैसलमेरको सूर्यगढ प्यालेसमा अग्निलाई साक्षी राखेर श्रीमान्-श्रीमतीको रुपमा जीवनभर साथ रहने वाचा गरेका दुवैले विवाहका तस्विरहरु आ-आफ्नो सामाजिक सञ्जालमा पोस्ट गरेका छन् ।
विवाहको तस्विरमा कियाराले पाउडर पिंक कलरको लेहंगा पहिरिएकी छन् भने सिद्धार्थ मल्होत्राले गोल्डन शेरवानी लगाएका छन् । विवाहको मण्डपमा खिचिएका तीनवटा तस्विरमध्ये पहिलोमा दुवै एकअर्कालाई नमस्कार गर्दै देखिएका छन् । त्यस्तै, दोस्रोमा एकअर्काको हात समाएर दुवै प्रफुलित मुद्रामा छन् भने तेस्रो तस्विरमा सिद्धार्थलाई कियाराले गालामा चुम्बन गरेको देख्न सकिन्छ ।
सिद्धार्थ विवाहको तस्विर पोस्ट्याउँदै लेख्छन्, ‘अब हाम्रो स्थायी बुकिङ भैसकेको छ । हाम्रो आगामी यात्राका लागि तपाईंहरुको माया र आर्शीवाद चाहन्छौं ।’ उनीहरुको विवाहमा सहभागी हुनका लागि कयौं सेलिब्रेटीहरु पुगेका थिए । अब यो जोडीले मुम्बईमा रिसेप्सन पार्टीको आयोजना गर्दैछ, जहाँ बलिउडकर्मीदेखि राजनीतिज्ञसम्मको उपस्थिति रहने भारतीय मिडियाले बताएका छन् ।
