काठमाडौं । थाइल्याण्डमा यात्रु बोकेको भ्यानमा आगलागी हुँदा ११ जनाको मृत्यु भएको छ । बीबीसीका अनुसार मृत्यु हुनेमा दुई बालबालिका रहेका छन् ।
यात्रु बोकेको भ्यान राजमार्गमा जाने क्रममा शनिबार राति नाखोन रातचासिमा प्रान्तमा दुर्घटना भएको प्रहरीले जनाएको छ । दुर्घटनाका कारण भ्यानमा आगो लागेको छ । गाडीमा जम्मा १२ जना सवार थिए ।
उक्त गाडी अमानत चारियोन प्रान्तबाट बैंकक जाँदै गरेको समाचार एजेन्सी एएफपीले प्रहरी अधिकृत यिंगोस पोलाडजेलाई उद्धृत गर्दै जनाएको छ । दुर्घटनालगत्तै एक यात्रुले झ्यालबाट निस्किएर ज्यान जोगाएका छन् ।
