काठमाडौँ । पोर्चुगिज फरर्वाड क्रिस्टियानो रोनाल्डो साउदी अरब पुगेका छन् । नयाँ क्लब अलनासरसँग सम्झौता गरेपछि रोनाल्डो मंगलबार बिहान सपरिवार साउदी पुगेका हुन् ।
रोनाल्डोको आज अल नासरमा मेडिकल हुने छ भने आजै क्लबले उनको स्वागतमा कार्यक्रम पनि गर्ने जनाएको छ, अल नासरले आज रोनाल्डोलाई आधिकारिक रुपमा भित्र्याएको घोषणा गर्ने छ । यसका लागि क्लबले रियादस्थित मिर्सूल पार्कमा विशेष कार्यक्रम गर्ने जनाएको छ ।
रोनाल्डो खेल्नका लागि फिट भएमा उनी अल नासरको विहिबार हुने अल टायीविरुद्धको खेल खेल्न सक्ने बताइएको छ । १७७ मिलियन डलर बार्षिक पारिश्रमिक लिएर रोनाल्डोले अल नासरमा साढे दुई बर्षको सम्झौता गरेका छन् ।
मिडिया रिपोर्टका अनुसार रोनाल्डोको सम्झौतामा यदि न्यूक्यासल युनाइटेड आउदो सिजनमा च्याम्पियन्स लिगमा छनौट भएमा अल नासरबाट न्यूक्यासल लोनमा जान सक्ने समेत शर्त राखिएको छ ।
