काठमाडौँ । टेस्ला र ट्वीटरका मालिक एलन मस्कको नाममा एक खराब किर्तिमान बनेको छ । ब्लूमबर्ग बिलियनेयर इन्डेक्सका अनुसार मस्क २०० बिलियन डलर गुमाउने विश्वको पहिलो व्यक्ति बनेका हुन् ।
जनवरी २०२१ मा मस्कको व्यक्तिगत सम्पत्ति २०० बिलियन डलर नाघेको थियो, जब उनले अमेजनका मालिक जेफ बेजोसलाई पछाडि पारेका थिए । यसपछि उनको कुल सम्पत्ति ३ सय बिलियन डलर नाघेको थियो ।
टेस्लाको शेयरमा हालै आएको गिरावटपछि मस्कको कुल सम्पत्ति १३७ बिलियन डलरमा झरेको छ । टेस्लाको सेयर डिसेम्बर २७ मा ११ प्रतिशतले घटेको थियो ।
नोभेम्बर २०२१ मा, मस्कको कुल सम्पत्ति ३४० बिलियन डलरको शिखरमा पुगेको थियो । त्यसयता मस्क एक वर्षभन्दा बढी समयसम्म विश्वको सबैभन्दा धनी व्यक्ति बनेका थिए । यद्यपि, गत महिना फ्रान्सेली व्यवसायिक टाइकुन बर्नार्ड अर्नाल्टले मस्कलाई पछि पार्दै विश्वको सबैभन्दा धनी व्यक्ति बनेका छन् ।
अक्टोबर २०२२ मा, विश्वका दोस्रो धनी व्यक्ति मस्कले ४४ बिलियन डलरमा ट्विटर किनेका थिए । त्यसपछि मस्कले आफ्नो लागत चुक्ता गर्न इलेक्ट्रोनिक कार कम्पनी टेस्लाको सेयर बेचे । टेस्लाको शेयर यस वर्ष ६५ प्रतिशतभन्दा बढीले घट्यो
मस्कले पछिल्ला केही दिनहरूमा लगातार टेस्लाको सेयर बेचेका छन् । मस्कले डिसेम्बर महिनामा मात्र ३ दिनमा टेस्लाको करिब २२ मिलियन शेयर बेचेका थिए, जसको मूल्य करिब ३.६ बिलियन डलररहेको थियो । टेस्लाको शेयर यस वर्ष ६५ प्रतिशतभन्दा बढी घटेको छ । तिनीहरू वर्षको सुरुमा ४०० डलरको नजिक थिए र अहिले १२५ डलरको नजिक पुगेका छन् ।
शेयर बेचिसकेपछि पनि मस्क टेस्लाको सबैभन्दा ठूलो सेयरहोल्डर कायम रहेका छन् । कम्पनीमा उनको सबैभन्दा बढी १३.४ प्रतिशत सेयर छ । गत वर्ष कम्पनीको बजार मूल्य १ ट्रिलियन डलर थियो जुन घटेर ४९५ बिलियन डलरमा झरेको छ ।
रोयटर्सको रिपोर्टका अनुसार मस्कले एक वर्षमा हालसम्म ४० बिलियन डलर मूल्यको टेस्ला शेयर बेचिसकेका छन् ।
