काठमाडौं । नेपालकै सबैभन्दा ठूलो धनराशिको रियालिटी शा ‘मेरो भ्वाइस युनिभर्स र मेरो डान्स युनिभर्स’ आयोजना हुनेभएको छ । आयोजक इन्ट्रा नेशनल वेलफेयर एण्ड सपोर्ट फाउण्डेशन अफ अमेरिकाले बुधबार साँझ काठमाडौंको होटल मेरियटमा एक कार्यक्रमको आयोजनासहित शोको घोषणा गरेको हो । यसअघि ‘मेरा डान्स कप र मेरो भ्वाइस कप यूएसए’को आयोजना गरिसकेको इन्ट्रा फाउण्डेशनले अब विश्वभर छरिएर रहेका नेपाली भाषीहरूलाई समेटर दुई रियालिटी शोको आयोजना गर्न लागेको हो ।

प्रतियोगितामा भाग लिन चाहने नेपाली भाषीहरूले इन्ट्रा फाउण्डेशनको एप डाउललोड गरेर आफ्नो नाम आवेदन दिन सक्नेछन् । यी दुवै रियालिटी शोका विजेताले एक–एक करोड पुरस्कार पाउनेछन् । यस्तै, दुवै रियालिटी शोको फष्ट रनरअपले ३०-३० लाख र सेकेण्ड रनरअपले २०-२० लाख पुरस्कार राशी प्राप्त गर्नेछन् ।

घोषणा समारोहमा दुवै रियालिटी शोका निर्णायक मण्डललाई परिचय गराइएको थियो । ‘मेरो भ्वाइस युनिभर्स’को निर्णायक मण्डलमा सुरेश अधिकारी, शिव परियार, अञ्जु पन्त, सुजाता वर्मा, पुष्पन प्रधान हुनुहुन्छ भने ‘मेरो डान्स युनिभर्स’को निर्णायक मण्डलमा मिथिला शर्मा, दिलिप रायमाझी, शंकर बिसी, केकी अधिकारी, प्रियंका कार्की, नरमन राई रहनुभएको छ । यी दुवै शोको निर्देशन एलिन श्रेष्ठले गर्नुहुनेछ ।