यस्तो खाले प्रकृतिले नै व्यवस्था गरिदिएको ‘भ्यू टावर’ भारतसँगको सिमा क्षेत्र पाँचथर, इलामका सन्दकपुर, चारराते चउर, फालोट सेरोफेरो पुग्नुपर्छ । जहाँबाट देखिइने प्राकृतिक सौन्दर्यताले धेरै आह्लादित होइन्छ । यी क्षेत्र मुख्यगरि रोमाञ्चक सूर्योदयको नजरपान गर्न पाइने आकर्षक गन्तव्य स्थलका रुपमा विगत देखिनै चर्चित छन् ।
यीनै क्षेत्रले उत्तरी कञ्चनजंघा, कुम्भकर्ण, मकालु लगायतका मनोरम हिमश्रृङ्खला पनि देखाउछन् । यहाँबाट देखिने हिमालले आउ मलाई हेर्न भन्दै आव्हन गरिरहे झै मिठो आभास हुन्छ । यहाबाट सयौं पहाडी थुम्काथुम्कीको शोभा पनि देख्न पाइन्छ । पाँचथर, इलाम, ताप्लेजुङ, संखुवासभा, तेह्रथुम, धनकुटाका धेरैखाले पहाडी परिदृष्य समेत अवलोकन गर्न सकिन्छ ।
चौंरी चर्ने सैलुङ्गे क्षेत्र सन्दकपुर, चारराते, फालोटको अर्को मनमोहक पक्ष हुन् । यहाँ चौरीका बथानसँग खुबै रमाउन पाइन्छ । सन्दकपुर, चारराते, फालोटबाट नेपालका मोहक परिदृष्य हेर्न वर्षेनी सयौं देशी–विदशी पर्यटक आउछन् । यसबाट भारतीय पक्षले गजबको आम्दानी गरिरहेको अवस्था छ । नेपाल पक्षबाट पर्यटन प्रवद्र्धन नहुदा नेपाली लाभान्वित हुनबाट बञ्चित हुनु परिरहेको छ ।
