काठमाडाैं । दैलेख लगायतका कर्णाली प्रदेशका विभिन्न जिल्लामा फिरन्ते जिवन बिताउँदै आएका राउटेलाई नेपाली नागरिकताको प्रमाणपत्र जारी गर्न माग गर्दै सर्वोच्च अदालतमा रिट निवेदन दायर भएको छ ।
प्रधानमन्त्री तथा मन्त्रीपरिषदकाे कार्यालय, गृह मन्त्रालय र जिल्ला प्रशासन कार्यालय दैलेखलाई विपक्षी बनाइ रिट दायर गरिएको छ । राउटेहरु हाल दैलेखको नारायण नगरपालिका ८ मा १४३ जनाको संख्यामा बसोबास गरिरहेका छन् ।
नेपाल नागरिकता ऐन २०६३ को दफा ८ को उपदफा ४ र ५ एवं नेपाल नागरिकता नियमावली २०६३ को नियम ३ को उपनियम २ समेतको आधारमा राउटे जातिलाई उच्च प्राथमिकताका साथ प्रमाणपत्र वितरणको व्यवस्था मिलाउन गृह मन्त्रालयले २०७३ फाल्गुण २४ मा नै परिपत्र गरिसकेको रिटमा उल्लेख छ ।
