मंसिर ७ काठमाडौं । हुम्लामा निर्वाचन भएको चार दिन बित्दा पनि मतपेटिका संकलन हुन सकेको छैन । प्रदेशसभा २ का मतपेटिकाहरू अझै सदरमुकाम आउन नसक्दा मत गणना पनि सुरु हुन सकेको छैन । सो क्षेत्रका ३४ केन्द्रका १ सय ३६ मतपेटिका सर्केगाड केन्द्रमा थन्क्याइएको छ ।
हेलिकप्टर उपलब्ध नहुँदा मतपेटिका सदरमुकाम सिमकोट लैजान नसकिएको महादेव माध्यमिक विद्यालय दार्मा मतदान केन्द्रका मतदान अधिकृत भीमबहादुर रोकायाले बताए । मतदान अधिकृत, कर्मचारी, म्यादी प्रहरी, सुरक्षाकर्मीलाई समेत समस्या भएको र ४९ कर्मचारी र सुरक्षाकर्मी लिमिमै अलपत्र परेको रोकायाले बताए ।
अत्यधिक चिसो रहेको लिमीमा खान बस्नका लागि समेत समस्या भएको कर्मचारीले गुनासो गरेका छन् । उच्च हिमाली भेग हुँदै फर्कनुपर्ने भएकाले पैदल फर्कने अवस्था नरहेको बताइएको छ ।
