काठमाडौँ, २२ मंसिर । नेपाली कांग्रेस संस्थापनइतरको भेला बानेश्वरस्थित अनुपम फुडल्यान्डमा सुरु भएको छ । संस्थापनइतरको बैठकमा सभापतिका आकांक्षी शेखर कोइराला र प्रकाशमान सिंह भने उपस्थित छैनन् । भेला सुरु भएलगत्तै वरिष्ठ नेता रामचन्द्र पौडेल भने भेला स्थलबाट बाहिरिएका छन् ।
भेलामा रामशरण महत, अर्जुननरसिंह केसी, मिनेद्र रिजाल, गगन थापा, दिलेन्द्र बडु, चित्रलेखा यादवलगायतका नेताहरु उपस्थित छन् ।
त्यस्तै, जिल्ला सभापति, निवर्तमा जिल्ला सभापति, प्रदेश सभापति, केन्द्रीय सदस्य मात्रै सहभागी भएका छन् । भेलालले नेताहरुलाई उम्मेदवारीका विषयमा राय दिने बताइएको छ ।
मंगलबार चाक्सीबारी बैठकपछि वरिष्ठ नेता पौडेले बुधबार बेलुकासम्म साझा उम्मेदवार तय गर्ने बताएका थिए । पौडेलले सभापतिका आकांक्षीसँग छुट्टाछुट्टै छलफलसमेत गरेका थिए ।
छलफलपछि सभापतिका आकांक्षीमध्येका शशांक कोइरालाले दाबी छाडेको बताएका थिए । कांग्रेसको १४औँ महाधिवेशन यही मंसिर २४ गतेदेखि काठमाडौँमा हुने तय भएको छ ।
