पोखरा
गण्डकी प्रदेशको मुख्यमन्त्रीमा पुनः नियुक्त हुनुभएका  पृथ्वीसुब्बा गुरुङले पद तथा गोपनियताको सपथ ग्रहण गर्नुभएको छ ।  मुख्यमन्त्री गुरुङले प्रदेश प्रमुख सीताकुमारी पौडेल बाट आजै पद तथा गोपनियताको सपथ ग्रहण गर्नुभएको हो । संविधानको धारा १६८ (३) अनुसार प्रदेश प्रमुख सीताकुमारी पौडेलले गुरुङलाई बुधबार मुख्यमन्त्रीमा नियुक्त गर्नुभएको थियो ।
२६ वैशाखमा गुरुङले मुख्यमन्त्री बाट राजीनामा दिएपछि प्रदेश प्रमुख पौडेलले ३ दिनभित्र बहुमतको सरकार दाबी गर्न समय दिनुभएको थियो । ३ दिनको समयसिमा आज सकिदा बहुमतको सरकार बन्न नसकेपछि प्रदेश सभाको सबैभन्दा ठूलो दल एमाले संसदीय दलका नेता गुरुङ मुख्यमन्त्री बन्नुभएको हो ।
तिन दिनको अवधिमम बहुमतको सरकार बनाउन कांग्रेस संसदीय दलका नेता कृष्णचन्द्र नेपालीले प्रयास गरेपनि जनमोर्चाका सांसदले साथ नदिएपछि उहाँ सफल हुन सक्नुभएन । उहाँलाई कांग्रेस, माओवादी केन्द्र र जसपाको साथ थियो । जनमोर्चाको मत एकै नहुँदा नेपाली मुख्यमन्त्री बन्न असफल हुनुभयो । जनमोर्चाका संसदीय दलका नेता कृष्ण थापा र अर्का सांसद खिमविक्रम शाहीले साथ नदिएपछि कांग्रेसका संसदीय दलका नेता कृष्णचन्द्र नेपालीले आफ्नो पक्षमा ३१ जना सांसदको हस्ताक्षर पुर्याउन नसक्नुभएको हो ।
मुख्यमन्त्री गुरुङले प्रदेश सभाबाट एक महिना भित्रमा विश्वासको मत लिनु पर्नेछ ।