नेपाल कम्युनिष्ट पार्टी नेकपाभित्रको विवादमा गृहमन्त्री रामबहादुर थापा ‘बादल’ प्रधानमन्त्री केपी ओलीसँगै रहने सम्भावना देखिएको छ। नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल र माधव नेपालले मंगलबार गरेका छुट्टाछुट्टै भेलामा बादल कतै पनि सहभागी भएका थिएनन्।
ओली समूहले जम्बो केन्द्रीय समिति घोषणा गरेर आफ्ना पक्षमा अत्यधिक बहुमत देखाएको छ भने प्रचण्ड-नेपाल समूहले ओलीलाई कारबाही गरेर माधव नेपाललाई अध्यक्ष बनाएको छ।
यी दुवै भेलामा बादललाई बोलाइएको भए पनि उनी कतै गएनन्। बादललाई प्रचण्डले सोमबार र मंगलबार दुई दिनसम्म भेटेका थिए। प्रधानमन्त्री ओलीले पनि बादललाई बालुवाटार बोलाएर छलफल गरेका थिए। बुधबार प्रधानमन्त्रीसँग भएको छलफलपछि बादल निकट स्रोतले बुधाबार साँझसम्म बादलको धारणा आउने बताएको थियो।
