काबुल, १५ असोज पश्चिमी अफगानिस्तानको हेरात प्रान्तस्थित इस्लाम काला सीमा नाकामा बुधबार साँझ भएको ठूलो आगलागीमा १८ वटा इन्धन ट्याङ्कर पूर्ण रूपमा जलेका छन् भने तीनवटा ट्याङ्करमा आंशिक क्षति पुगेको छ । अफगानिस्तानको राष्ट्रिय विपद् व्यवस्थापन प्राधिकरणले बिहीबार घटनाबारे जानकारी दिएको हो ।
प्राधिकरणका अनुसार आगलागी सुरु भएपछि अग्निनियन्त्रण टोली तत्काल घटनास्थलमा पुगेको थियो । टोलीले आगो नियन्त्रणमा लिएर थप फैलिनबाट रोकेको अधिकारीहरूले बताएका छन् । आगलागीको कारण भने अझै खुल्न सकेको छैन र घटनाबारे अनुसन्धान भइरहेको छ ।
घटनास्थलमा सुरक्षा तथा सम्बन्धित निकायका कर्मचारीहरू परिचालन भइरहेका छन् । उनीहरूले अवस्थाको निरन्तर निगरानी गर्नुका साथै आगलागीबाट भएको क्षतिको विस्तृत विवरण सङ्कलन तथा मूल्याङ्कन गरिरहेको प्राधिकरणले जनाएको छ ।
हेरात सहरबाट करिब १२० किलोमिटर टाढा रहेको इस्लाम काला अफगानिस्तान र इरानबीचको प्रमुख स्थल सीमा नाका हो । यो नाका दुई देशबीचको महत्त्वपूर्ण व्यापारिक तथा पारवहन मार्गका रूपमा रहेको छ ।
सीमा नाकाबाट दैनिक हजारौँ यात्रु आवतजावत गर्नुका साथै ठूलो परिमाणमा वस्तु तथा सामान ओसारपसार हुने गरेको छ । त्यसैले इन्धन ट्याङ्करमा भएको आगलागीबाट भएको क्षतिको मूल्याङ्कनसँगै सीमा नाकाको नियमित गतिविधिबारे पनि सम्बन्धित निकायले निगरानी गरिरहेको छ ।
प्रतिक्रिया दिनुहोस