१९ असोज, लुम्बिनी प्रदेशका मुख्यमन्त्री शंकर पोखरेलले दाङको भलुवाङलाई प्रशासनिक र बुटवललाई वित्तीय र पर्यटकीय राजधानीका रुपमा विकास गर्ने आश्वासन दिएका छन् ।
दाङको भलुवाङलाई प्रदेश राजधानी बनाउने प्रस्ताव प्रदेशसभामा पेश भएपछि सत्तारुढ नेपाल कम्युनिस्ट पार्टीकै १४ सांसदले फरक मत राखेका छन् । सोमबार बसेको संसदीय दलको बैठकमा भौतिक पूर्वाधारमन्त्री बैजनाथ चौधरीले समेत बुटवलका जनताको भावनालाई सम्बोधन गर्नुपर्ने धारणा राखेका थिए ।
मुख्यमन्त्री एवं नेकपा संसदीय दलका नेता पोखरेलले बैठकमा संरचनाहरु नबन्दासम्म अस्थायी राजधानी बुटवलमै रहने बताए । साथै बुटवललाई वित्तीय र पर्यटकीय राजधानीका रुपमा विकास गर्ने र भालुवाङलाई प्रशासनकीय राजधानीका रुपमा अगाडि बढाउने उनले बताए । यसले बुटवलका जनताको भावनालाई यथोचित न्याय दिनेमा आफु विश्वस्त रहेको कुरा उनको सचिवालयले अखबारदैनिकालाई जानकारी दियो ।
