काठमाडौं । इजरायली प्रधानमन्त्रीको कार्यालयले चार दिनयता द्वन्द्वका क्रममा इरानले ३७० ब्यालिस्टिक मिसाइल र सयौँ ड्रोन आफ्नो देशतिर प्रहार गरेको जनाएको छ ।
गएको शुक्रबारदेखि सुरु द्वन्द्वमा सोमबार बिहानसम्म इजरायलमा २४ जनाको मृत्यु भएको छ । ५९२ जना घाइते छन् । घाइतेमध्ये १० जनाको अवस्था गम्भीर रहेको सीएनएनले जनाएको छ । इरानले इजरायलका ३० स्थानमा ‘सफलतापूर्वक’ आक्रमण गरेको छ । इरानमा भने कम्तीमा २२४ जनाको मृत्यु भएको जनाइएको छ ।
रातभरको हमलामा इजरायलमा मृत्यु हुनेको संख्या आठ पुग्यो
इजरायलको मध्यभागमा गए रातभर गरिएको इरानी हमलामा ज्यान गुमाउनेको संख्या आठ पुगेको छ । इजरायलको राष्ट्रिय आपत्कालीन सेवा मागेन डेभिड एडोमका अनुसार, उत्तरी सहर हाइफामा तीनजनाको मृत्यु भएको छ । मध्य इजरायली सहर बने ब्राकमा एकजनाको मृत्यु भएको छ । पेटाह टिक्वामा चारजनाको मृत्यु भएको जनाइएको छ ।
विश्लेषक भन्छन्– इजरायलले इरानी क्षमतालाई कम आँक्यो
इजरायलको प्रारम्भिक आक्रमणमा धेरै इरानी सैन्य कमान्डरको मृत्यु भए पनि तेहरानले पुनः संगठित हुने क्षमता देखाएको एक विश्लेषकले सीएनएनलाई बताएका छन् ।
“इजरायलीले इरानी सैन्य नेतृत्वलाई सफलतापूर्वक लक्ष्य बनाएर धेरै मानिसलाई मारेपछि पनि इरान पुनः संगठित हुने क्षमतालाई कम आँके,” क्विन्सी इन्स्टिच्युट फर रेस्पन्सिबल स्टेटक्राफ्टका उपाध्यक्ष त्रिता परसीले भने ।
उनले अगाडि भने, “इजरायलले उनीहरूले इरानी कमान्डर र नियन्त्रण प्रणालीलाई अवरुद्ध गरेको भन्ने के सोचे, तर त्यो विचार चाँडै नै असान्दर्भिक भयो ।” सीएनएन
