काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईं कार्यालय छिर्ने भएपछि महानगर परिसरमा नगर प्रहरी परिचालन गरिएको छ । कमलादीस्थित महानगर कार्यालयमा बिहीबार बिहान महानगरका प्रहरी परिचालन गरिएको हो ।
महानगरको कार्यालयमा एकातिर कर्मचारीहरू सबै वडाबाट जम्मा भएर प्रमुख प्रशासकयि अधिकृतको स्वागतका लागि बसेका छन् भने अर्कोतर्फ उनलाई रोक्न मेयर बालेन शाहले नगर प्रहरी तैनाथ गरेका छन् । पाँच महिनादेखि तलब नपाएको र महानगरको काम ठप्प भएको भन्दै कर्मचारीले नै प्रशासकीय अधिकृतलाई हाजिर गराउन खोजेका हुन् ।
काठमाडौं टावरको नक्सा पासमा अनियमितता गरेको भन्दै मेयर शाहले गुरागाईंलाई अघोषित निलम्बनमा राखेका थिए । उनलाई कार्यालयमा प्रवेश निषेध गरिएको थियो । यता सरकारले अर्को प्रमुख प्रशासकीय अधिकृत नपठाएपछि महानगरमा सङ्कट चुलिएको हो ।
