५ असार ,काठमाडौं । नेपालका दुई छिमेकी मुलुक भारत र चीनबीच लद्दाखमा भएको झडपले टकरावको अवस्थामा रहिरहेका बेलामा सत्तारुढ नेपाल कम्युनिष्ट पार्टी नेकपा भने चीनतिर ढल्किएको देखिएको छ । 

नेपाल भारत सीमामा समेत अप्ठेरो अवस्था सिर्जना भइरहेका बेलामा नेपाल र चीनका सत्तारुढ दलका नेताहरुबीच शुक्रबार छलफल हुँदैछ । 

शुक्रबार दुई देशका सत्तारुढ दलबीच भर्चुअल बैठक हुन लागेको हो । पार्टी र देशलाई सत्ता परिचालन गर्ने अनुभव आदान प्रदान गर्न चीन र नेपालका सत्तारुढ पार्टीका उच्च पदाधिकारीबीच गोष्ठी हुन लागेको बताइएको छ । 

कोरोना भाइरसको महामारीका बेलामा अनुभव आदान प्रदान गर्ने बहाना बनाइए पनि विकसित राजनीतिक घटना क्रमले यो छलफललाई दक्षिण एसियाली क्षेत्रमा विकसित राजनीतिक घटनाक्रमसँग जोडेर समेत हेर्न थालिएको छ । 

यस अर्थमा पनि चिनियाँ कम्युनिष्ट पार्टी अन्तराष्ट्रिय विभाग र नेपाल कम्युनिष्ट पार्टी केन्द्रीय पार्टी स्कुल विभागको संयुक्त आयोजनामा यो गोष्ठी हुन लागेको हो । 

खासगरी चिनियाँ कम्युनिष्ट पार्टीको मुखपत्र ग्लोबल टाइम्सले भारतले चीन, नेपाल र पाकिस्तानी सीमामा तनाव बढाइरहेका बेलामा तीन वटै मोर्चामा सैन्य कार्वाही हुने बताइरहँदा नेपालका सत्तारुढ दल नेकपाका १०० भन्दा बढी नेताहरु छलफलमा जुट्नुलाई संयोगमात्र मान्न नसकिने स्वयं नेकपाका नेताहरु बताउँछन् । 

क्षेत्रिय राजनीति समन्वयतर्फभन्दा ध्रुबीकरणतर्फ बढिरहेका बेला यो बैठक कोभिड १९ को महामारीमा मात्रै केन्द्रीत हुने नभई क्षेत्रिय तनावको विषयमा समेत केन्द्रीत हुने स्कुल विभागका एक सदस्यले बताए ।