रूपन्देही । कोटहीमाई गाउँपालिका– ५ देवनबक्सापुरका रामायन पालले भेडापालन गरिरहेको २० वर्ष भयो। उनको अधिकांश समय घर बाहिर नै बित्ने गरेको छ।
भेडा चराउन पाल मर्चवार मात्र नभई भैरहवा, लुम्बिनीलगायत क्षेत्रमा लैजान्छन्। करिब ३०० भेडाबाट सुरु भएको ‘भेडिहार’ पालको यो यात्रामा बिराम लाग्ने अवस्था उत्पन्न भएको छ । हाल उहाँसँग ३५ वटा मात्र भेडा छन् । यसअघि चरन क्षेत्रको समस्या थियो नै अब भेडाको ऊन नै बिक्री हुन छाडेपछि पाल मात्र होइन भेडिहार समुदायको पेशामा संकट आएको छ।
मर्चवारको मुख्य बाटोमा भेडाको रौँ काटेर यत्रतत्र फालिएको भेटिन्छ । भेडाको ऊन बिक्री हुन छोडेपछि भेडिहारले जहा रौँ काट्यो त्यही छोडेर हिँड्ने गरेका छन् । ऊन नै बिक्री हुन छोडेपछि विस्तारै उहाँहरुको रुचि यसबाट घट्न थालेको छ। ‘पहिला मसँग ३०० बढी भेडा थिए, ऊन पनि १०० किलोभन्दा बढी बेच्ने गरेको थिएँ’ पालले भने, ‘केही वर्षयता ऊन बिक्नै छोडेको छ। त्यसैले अहिले सङ्ख्या घटाएर ३५ बनाएको छु।’
यसअघि विभिन्न स्थानबाट क्रेताहरू भेडिहार खोज्दै उनीहरूको घर वा चरनस्थलमै पुग्ने गरेका थिए। तराईमा सामान्यतः भेडाको मासु पनि खाइँदैन। त्यसैले भेडा पाल्नेको अब आम्दानीको स्रोत शून्य भएको छ।
भेडाको ऊनबाट बनेका कपडामा उपभोक्ताको रुचि घट्दै गएको कारण ऊन बिक्री नभएको कोटहीमाई गाउँपालिका-३ कुडसर बस्ने वरुनदेव पाल बताउँछन्। ‘पहिला भेडाको ऊनबाट बनेको कपडाको माग उच्च रहेको थियो र यस पेसाबाट धानिन बल पुगेको थियो’, उनले भने, ‘अहिले त्यस्ता उद्योग बन्द हुँदै गएकाले पनि यसको माग नभएको हुन सक्छ।’
भेडाको ऊनबाट कम्बल, स्विटर, टोपीलगायत न्याना कपडा बुनिन्छ तर आधुनिक ब्लाङकेटले यसलाई विस्थापित गरेको छ। ब्लाङ्केट दुई हजारदेखि तीन हजार रुपैयाँमा पाइन्छ। ऊनबाट बनाइएका कम्बल तुलनात्मक रुपमा महँगा भएकाले ऊनको माग घटेको उनको बुझाइ छ।
यसबाहेक अहिले तराईमै भेडाहरूको लागि चरन क्षेत्रको समस्या पनि छ। ‘पहिला धेरै खेत थिए चरन क्षेत्र पनि प्रशस्त हुन्थ्यो’, स्थानीय नापु पालले सुनाए, ‘चरनक्षेत्र अभावमा अब भेडा पाल्न गाह्रो छ।’
मर्चवारको कोटहीमाई गाउँपालिका-३र ५ को सम्मरीमाई गाउँपालिकालगायत जिल्लामा भेडा पाल्नेहरू उल्लेख्य थिए। एक दशकअघि ३० हजारभन्दा बढी भेडा आफूहरूले पालेको पाल बताउँछन्। चरन क्षेत्रको कमी, ऊन र दूध र मासु पनि बिक्री नहुने भएपछि घरखर्च जुटाउन बाध्य भएर वैकल्पिक पेसामा लाग्नुपरेको उनको भनाइ छ। रासस
