काठमाडौँ । चलचित्र विकास बोर्डले आउटडोर स्टुडियो निर्माणका लागि धुलिखेल नगरपालिकासँग १३०० रोपनी जग्गाका लागि सम्झौता गरेको छ । सोमबार धुलिखेल नगरपालिकाको ३९औँ स्थापना दिवसको अवसरमा चलचित्र विकास बोर्ड र धुलिखेल नगरपालिकाबिच जग्गा हस्तान्तरणसम्बन्धी प्रारम्भिक सम्झौता भएको हो ।

नगरपालिकाका मेयर अशोक कुमार ब्याञ्जु श्रेष्ठ र चलचित्र विकास बोर्डका अध्यक्ष दिनेश डिसीले सम्झौता पत्रमा हस्ताक्षर गरे । कार्यक्रममा पूर्व सञ्चारमन्त्री गोकुल बास्कोटा,  उपमेयर निराजन जंगम, चलचित्र विकास बोर्ड सदस्य केवल पीडित, चलचित्र कलाकार संघका पूर्वअध्यक्ष रविन्द्र खड्कालगायतको उपस्थिति थियो । बोर्ड अध्यक्ष डिसीले जग्गामा बोर्डलेको आउटडोर स्टुडियो निर्माण गर्ने योजना रहेको बताए ।

‘यो स्टुडियो नेपाली चलचित्र उद्योगको लागि नयाँ माइलस्टोन सावित हुनेछ’, उनले भने,‘प्राकृतिक सुन्दरता र अत्याधुनिक प्रविधि संयोजन गरेर चलचित्र निर्माणलाई सहज बनाउने परिकल्पना छ ।’ नगरपालिकाका मेयर अशोक कुमार ब्याञ्जु श्रेष्ठले चलचित्र क्षेत्रको विकासका लागि धुलिखेल नगरपालिकाले हरतरहले सहयोग गर्ने बताए ।  आउटडोर स्टुडियो परियोजनाले नेपाललाई अन्तर्राष्ट्रिय फिल्म गन्तव्यका रूपमा विकास गर्ने उनले धारणा राखे ।